Hariring Nu Kungsi Nyanding

Purnama nu kungsi leungit
ayeuna nganjang ka buruan deui
anu kungsi kapiati
kiwari urang ditepangkeun deui.

Hariring nu kungsi nyanding
ayeuna datang ngahaleuang deui
hayu pataréma tineung
cacapkeun meungpeung aya kasempetan

Ayeuna mangsa nu éndah
hayu urang suka bungah
caang bulan opat belas
narawangan haté bangbras

Ayeuna mangsa nu éndah
hayu urang suka bungah
caang bulan opat belas
narawangan ati bangblas.

Kembang Tanjung Panineungan

Anaking jimat awaking
basa ema mulung tanjung rebun-rebun
di pakarangan nu reumis kénéh
harita keur kakandungan ku hidep
geus opat taun katukang
ema nyipta mulung béntang
nu marurag peuting tadi
béntang seungit ditiiran pangangguran.

Anaking jimat awaking
basa ema mulung tanjung rebun-rebun
beut henteu sangka aya nu datang
ti gunung rék ngabéjakeun bapa hidep
nu opat poé teu mulang
ngepung gunung pager bitis
cenah tiwas peuting tadi
layonna keur ka dieukeun, dipulangkeun.

Harita waktu layonna geus datang
ema ceurik ieuh, balilihan
ras ka hidep ieuh na kandungan
utun inji budak yatim deudeuh teuing
harita waktu layon geus digotong
ema inget ieu kana tanjung
dikalungkeun napasaran
kembang asih panganggeusan ieuh, ti duaan

Anaking jimat awaking
lamun ema mulung tanjung reujeung hideup
kasuat-suat nya pipikiran
tapina kedalna téh ku hariring
hariring éling ku éling kana tanjung
nu dipulung éh, kembang tanjung
nu nyeungitan pakarangan
nu nyeungitan haté urang, panineungan

... Tilam Sono ...

Akang ..
Teu karaos nya, tos bade satengah warsih urang sasarengan. Mapay jalan satapak, ngalakonan carita nu pinuh rasa kaasih tina hate sanubari anu wening.

Akang, anu dipikameumeut..
Sing sanaos urang paanggang, nu sakapeung mah karaos pisan ku tebihna teh, arang tepang.. Nu ngajantenken rasa kasono ka salira ngagedur, teu tiasa dipapalèrkeun. Tapi da urang tos paheut jangji, dimana waè ayana moal kantos mopohokeun. Teu welèh deukeut, ceuk raraosan mah. Sumuhun, perkawis kanyaah sareng perhatosan ti salira mah, Nyai oge moal badè cangcaya. Yaktos pisan, akang. Salira moal bade jalir jangji. Naha atuh, naon nya? Anu sok janten bahan emutan na diri?

Akang..
Hapunten sateuacanna. Rumaos, kamelang Nyai ka salira ageung pisan. Sakapeung mah sok teu pupuguh hayang ceurik atanapi hayang lumpat, muru kanu dipikatineung. Teu welèh naros ka diri, duuh.. iraha urang bakal ngahiji pikeun mapag poè anu pinuh ku kabagjaan, nu dipayungan ku kaasih sareng rido ti manten-Na? Duuh, .. hapunten, Akang! Hapunten, pisan! Teu aya maksad bade aral subaha kana papastèn-Na. Sanes, kang. Panginten èta mah mung saukur kamelang nu datangnya sajorèlat.

.. Rusiah ..

Kamari mah, bet asa teu genah cicing. Ratug tutunggulan, rarasaan mah langit ngadadak jadi angkeub. Hayang ngajerit, tapi teu nyora. Hayang lumpat, ieu suku bet asa dibeungbeuratan, hèse dibawa ngalèngkahna. Ukur cipanon nu reumbay dina kongkolak panon, maseuhan pipi.

Duh, Gusti! Ceuk gerentes hatè. Naha bet kudu ngalaman nasib siga kieu? Naha naon atuh dosa kuring ka manèhna? Bet taya ras-rasan nyieun waè kapeurih. Sakitu apan manèhna nu tiheula mèrè kanyèri teh. Duh.. Gusti! Ieu hatè teu wèlèh dibawa sabar. Sanajan sakapeung mah sok hayang ngagantawang kana kalakuanna nu geus teu bisa katarima ku hatè kuring. Geus kaliwat ambekna atuda.

Ieu sirah mani asa lenglengan. Muih siga aya nu muterkeun. Ck.. Ck.. Ck.. !! Pisakumahaeun keuheulna hatè kuring harita, teu bisa digambarkeun. Malah ieu pipi beuki rambisak ku cipanon. Nahan ambek nu teu kungsi kedal.

***